Mashtronin shtetas të huaj në Call Center, arrestohen 6 persona në Tiranë. Shpallet në kërkim Julian Markaj
Qytetarë nga Greqia dhe Italia kanë rënë pre e mashtrimeve përmes një Call center-i në Tiranë, të cilët mashtroheshin që të investonin para në bursa. Gjashtë persona kanë rënë në pranga për mashtrimet, mes tyre përgjegjësi dhe shefja e personelit, ndërsa është shpallur në kërkim administratori i Call Center-it në Selitë të Tiranës.
Gjatë operacionit, në ambientet e këtij subjekti, Policia ka gjetur 53 operatorë të cilët mashtronin shtetasit e huaja që të investonin në bursa. Operatorët i kontaktonin në telefonin dhe i bindnin grekët dhe italianët që të investonin para duke iu premtuar se do të fitonin shuma të mëdha parash, të cilat më pas nuk i merrnin më.
Mësohet se janë arrestuar Ermion Markaj, Patricja Radovani, Donald Toma, Areteo Butsi, Emanuele Jaho , Fiodor Ziu, ndërsa është shpallur në kërkim Julian Markaj.
Njoftimi i plotë:
Finalizohet operacioni policor i koduar “Selita Center”, për goditjen e veprimtarive kriminale në fushën e mashtrimit kompjuterik.
Zbulohet një subjekt ekonomik (firmë) që ishte përshtatur si call center.
Arrestohen në flagrancë 6 shtetas të punësuar në këtë subjekt (mes tyre përgjegjësi i firmës dhe shefja e personelit).
Shpallet në kërkim administratori i këtij subjekti.
Gjatë operacionit, në ambientet e këtij subjekti, Policia ka gjetur 53 operatorë të cilët mashtronin shtetas të huaj, kryesisht italianë dhe grekë, që të investonin para në tregje fiktive.
Sekuestrohen 101 kompjuterë, 2 laptopë, 1 DVR dhe 10 celularë, që u gjetën në ambientet e call center-it.
Specialistët e Sektorit për Hetimin e Krimeve Ekonomike dhe Financiare në Drejtorinë për Hetimin e Krimit Ekonomike dhe Financiare në Departamentin e Policisë Kriminale në DPPSH, bazuar në informacionet e siguruara nga inteligjenca informative për një rast të mashtrimit kompjuterik, në një subjekt privat, në Selitë, Tiranë, kanë organizuar dhe finalizuar operacionin policor të koduar “Selita Center”.
Gjatë këtij operacioni, shërbimet e Policisë kanë ndërhyrë në ambientet e këtij subjekti privat (firmë), ku kanë konstatuar disa shtetas që kryenin veprimtarinë e paligjshme të mashtrimit kompjuterik përmes call center-it.
Në vijim të veprimeve procedurale për këtë rast, u arrestuan në flagrancë shtetasit:
E. M., 35 vjeç, me detyrë përgjegjës i firmës, P. R., 29 vjeçe, me detyrë shefe e personelit të firmës, D. T., 27 vjeç dhe A. B., 36 vjeç, të katërt banues në Tiranë, si dhe shtetasit E. J., 29 vjeç dhe F. Z., 34 vjeç, të dy banues në Vlorë.
Gjithashtu, u shpall në kërkim administratori i këtij subjekti, shtetasi J. M., 31 vjeç.
Nga verifikimet ka rezultuar se shtetasit që u gjetën në këtë subjekt ishin punësuar në mënyrë të paligjshme dhe mashtronin shtetas të huaj, kryesisht italianë dhe grekë, që të investonin para në tregje fiktive.
Gjatë kontrollit në ambientet e këtij subjekti janë gjetur 101 kompjuterë, 2 laptopë, 1 DVR dhe 10 celularë, të cilët janë sekuestruar në cilësinë e provës materiale.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Mashtrimi kompjuterik”, “Punësimi i paligjshëm”, “Fshehja e të ardhurave”, “Mospagimi i taksave dhe tatimeve” dhe “Pastrimi i produkteve të veprës penale ose veprimtarisë kriminale”. /Call Center Julian Markaj Call Center Julian Markaj gj
