Agjencia Kombëtare e Mbrojtjes Civile ka bërë të ditur se në orët e ardhshme pritet të ketë rritje të ndjeshme të reshjeve në disa zona të vendit, prej të cilave pritet të shkaktohen dhe probleme.
Parashikimi nga ekspertët e Institutit të Gjeoshkencave “IGJEO” tregon se gjatë ditës së nesërme, parashikohen reshje shiu të dendura që në orët e para të mëngjesit, në pjesën më të madhe të vendit.
Reshjet e dendura mund të shkaktojnë probleme si dhe vërshime të ujit në qarqet Shkodër, Kukës dhe Lezhë.
- Sasia e reshjeve pritet të jetë më intensive në qarqet Shkodër, Kukës dhe Lezhë.
- Në qarqet Dibër, Elbasan, Berat dhe Vlorë priten reshje shiu me intensitet mesatare deri lokalisht intensive.
- Reshje shiu me intensitet të ulët deri në mesatar priten në qarqet e tjera.
Në verilindje-lindje në lartësinë mbi 200-300 metra dhe në pjesën tjetër të vendit në lartësinë mbi 700-800 metra reshjet pritet të jenë në formën e dëborës me intensitet të ulët deri mesatar. Në verilindje-lindje hera-herës reshjet e borës pritet të jenë edhe në formën e stuhive të dëborës.
