Prokuroria e Gjirokastrës ka regjistruar procedim penal për veprën ‘Shkaktimi i vetëvrasjes’ për vdekjen e 17-vjeçares Irsa Muçollari, e cila dyshohet se i dha fund jetës në banesën e saj, për shkak se bullizohej.“Mbi bazën e materialeve të referuara nga Komisariati i Policisë Gjirokastër, Prokuroria pranë Gjykatës së Shkallës së Parë të Juridiksionit të Përgjithshëm, Gjirokastër ka regjistruar procedimin penal nr.70, të vitit 2025 në lidhje me ngjarjen e datës 10.02.2025, ku në banesën e saj në Gjirokastër u gjet e vdekur shtetasja e mitur I. M.,” informon organi i akuzës.
Njoftimi i Prokurorisë:
Vetëvrasja e të miturës I.M., në shtëpinë e saj, Prokuroria Gjirokastër regjistron procedim penal për veprën ‘Shkaktimi i vetëvrasjes’
Prokuroria pranë Gjykatës së Shkallës së Parë të Juridiksionit të Përgjithshëm Gjirokastër ka regjistruar procedimin penal për veprën penale ‘Shkaktimi i vetëvrasjes’ parashikuar në nenin 99 të Kodit Penal.
Mbi bazën e materialeve të referuara nga Komisariati i Policisë Gjirokastër, Prokuroria pranë Gjykatës së Shkallës së Parë të Juridiksionit të Përgjithshëm, Gjirokastër ka regjistruar procedimin penal nr.70, të vitit 2025 në lidhje me ngjarjen e datës 10.02.2025, ku në banesën e saj në Gjirokastër u gjet e vdekur shtetasja e mitur I. M.
Në kuadër të këtij procedimi,është ngritur grupi hetimor, i cili po kryen me prioritet të gjitha veprimet e nevojshme me qëllim zbardhjen e plotë të kësaj çështjeje, duke nisur nga pyetja e personave që kanë dijeni për veprën penale.
Vetëvrasja
Një ngjarje e rëndë tronditi Gjirokastrën pasditen e 10 Shkurtit, ku një 17-vjeçare u gjet e vetëvarur në banesën e saj.
Familjarët e zbuluan aktin tragjik disa orë më vonë, ndërsa ishte i ati ai që e konstatoi dhe njoftoi urgjencën.
Mjekët konstatuan se adoleshentja kishte ndërruar jetë, duke lënë pas një letër rrëqethëse që ka thelluar edhe më shumë tronditjen e familjes dhe komunitetit.
Letra që flet për bullizmin
Në sendet personale të vajzës, familjarët gjetën një letër të shkruar në anglisht, pa datë, në të cilën ajo rrëfente dhimbjen dhe izolimin që ndiente për shkak të bullizmit.
“Pse më bullizojnë mua?”, shkruante viktima, duke dhënë një sinjal të qartë se ndjehej e përjashtuar dhe e sulmuar nga bashkëmoshatarët.
Kjo ka ngritur edhe më shumë dyshime mbi faktorët që e çuan drejt aktit fatal. Në letrën e gjetur mes sendeve personale të vajzës flitej mbi ndjesitë e saj.
Ajo përshkruante trishtimin që ndiente për mënyrën se si vishej ndryshe nga bashkëmoshatarët, dëshirën për të pasur veshje më të bukura, shoqëri dhe afrimitet me ta.
Vajza ishte tip i mbyllur dhe ndihej e papranuar në shoqëri. Ndërsa familja e saj ishte në kushte të vështira ekonomike.
Si pasojë e një aksidenti në punë, i ati i vajzës nuk punonte prej vitesh dhe kjo ngjarje e kishte rënduar situatën familjare ekonomikisht dhe psikologjikisht.
Para se të kryente veprimin tragjik, 15-vjeçarja ishte larguar nga shkolla tre herë gjatë ditës, duke u kthyer në banesë, por çdo herë aty ndodhej i ati.
Vetëm pasi gjeti një moment kur ishte e vetme në shtëpi, ajo vendosi t’i japë fund jetës.
Ndërkohë, ngjarja ka rihapur debatin mbi bullizmin në shkolla dhe mungesën e mekanizmave të mbështetjes psikologjike për nxënësit.
Lexo edhe:
“Shokët tallen me mua! Nuk më vjen turp për veshjen time, kaq mundësi kanë prindërit” – Zbulohet letra e 17-vjeçares që u vet*vr* në Gjirokastër
SPAK regjistron procedim penal për ministren Ogerta Manastirliu
Kiara rrëfen e prekur pse u kthye në Shqipëri: Pati një krizë, prindërit nuk kishin mundësi ekonomike
