Ka marrë fund “thrilleri” në Larisa të Greqisë, ku 60-vjeçari Dimitris Koltsidas vrau dy persona brenda biznesit të zdrukthëtarisë që ai zotëronte, pas problemeve me borxhet.
Sipas mediave greke, autori i vrasjes së dyfishtë ka vdekur brenda punishtes së tij të drurit në Gonnoi të Larisës. “Koltsidas, i cili mbante në dorë një kallashnikov, ka qëlluar disa herë në ajër para se të kthente armën mbi vete dhe t’i jepte fund jetës”, raporton “Protothema”.
Policia hyri në punishten e zdrukthtarisë, së bashku me ekspertët piroteknikë, për të kontrolluar për granata dhe lëndë plasëse, pasi pretendohej se autori kishte në zotërim një të tillë.
Avokati i tij, Stelios Sourlas, i cili foli me gazetarët pas ngjarjes tragjike, tha se autori ishte i vendosur t’i jepte fund jetës dhe në komunikimin e tyre të fundit i tha: “Më vjen mirë që të takova, merre në dorë funeralin tim, nuk kam fare para”.
Menjëherë më pas, siç përshkroi ai, u dëgjuan të shtëna armësh dhe një zhurmë si shpërthim granate. Ai tha gjithashtu se 60-vjeçari po përballej me një problem të rëndë shëndetësor dhe ishte në fazën përfundimtare.
