Policia e Shtetit ka reaguar në lidhje me protestën që po zhvillohet në Tiranë duke u bërë thirrje protestuesve të shpërndahen.
Përmes një komunikate zyrtare policia paralajmëron protestuesit se nuk do të tolerojë veprime që bien ndesh me ligjin, që cënojnë rendin e sigurinë dhe lëvizjen e lirë të qytetarëve dhe të automjeteve.
Njoftimi i plotë i Policisë së Shtetit:
Në vijim të protestës së zhvilluar në bulevardin “Dëshmorët e Kombit”.
Gjatë përfundimit të protestës disa grupe të rinjsh kanë bllokuar lëvizjen e lirë të automjeteve dhe qytetarëve, si dhe po kundërshtojnë thirrjet e punonjësve të Policisë për të mos bllokuar rrugët pasi bllokimi i tyre përbën vepër penale.
Nisur nga situata e krijuar, Policia e Shtetit bën thirrje për personat që kanë bllokuar rrugët dhe kundërshtojnë punonjësit e Policisë, të ndalin menjëherë këto veprime dhe të shpërndahen, pasi do përballen me forcën e ligjit.
Policia e Shtetit është e vendosur të jetë në mbrojtje të të drejtave dhe lirive themelore të qytetarëve, edhe të atyre që protestojnë në mënyrë paqësore, si një e drejtë kushtetuese, por nga ana tjetër, Policia e Shtetit nuk do të tolerojë veprime që bien ndesh me ligjin dhe cënojnë rendin e sigurinë, lëvizjen e lirë të qytetarëve dhe të automjeteve.
Kujtojmë se pas protestës të mbajtur te kryeministria kundër rritjes së çmimeve, një pjesë e protestuesve kanë bllokuar Unazën e Vogël në Tiranë, duke hasur me kundërshtinë e forcave të policisë, të cilët janë munduar t’i shpërndajnë duke bërë dhe shoqërime të shumta në komisariat.
