Pakti mes socialisteve dhe demokratëve për listat, ngriti shumë pikëpyetje se sa deputetë do të jenë preferencë e kryetarëve dhe sa e qytetarëve.
Por Komisioni Qendror i Zgjedhjeve ka përllogaritur ndarjen e mandateve në listë të hapur dhe të mbyllur në 12 qarqet e vendit.
Sipas formulës që do aplikohet për herë të parë në zgjedhjet e 11 majit, 46 deputetët e parë të çdo subjekti garues do të jenë produkt i listës së mbyllur ku renditjen e ka caktuar kryetari, ndërkohë vetëm partitë që arrijnë të marrin një numër mandatesh që tejkalon listën e mbyllur do kenë mundësi të çojnë në Kuvend deputetë si preferencë e qytetarit.
Për zgjedhjet parlamentare të 11 majit, partitë politike duhet të gjejnë 186 kandidatë, pasi ndonëse garohet për 140 ulëse në Parlament, ndarja e listës së kandidatëve në dy pjesë, një e fiksuar dhe pjesa tjetër e hapur, detyron subjektet garuese të paraqesin më shumë emra.
Sipas projektvendimit të KQZ, parashikohet që partitë politike të paraqesin një listë të ndarë në dy pjesë, ku 46 do të jenë në pjesën e mbyllur ndërsa 140 në pjesën e hapur, ku do të garohet për çdo votë.
Përllogaritja:
Në zgjedhjet e 11 majit, në sistemin e ri zgjedhor që do të aplikohet në Shqipëri, 46 deputetët e parë të çdo partie do të jenë nga lista e mbyllur, e cila është përcaktuar nga partitë dhe votuesi nuk ka mundësi të ndikojë në renditjen e tyre.
Për partitë që fitojnë më shumë mandate se ato që kanë në listën e mbyllur, do të ketë mundësi të fusin deputetë nga lista e hapur, ku renditja përcaktohet nga votuesit.
Dyzetë e gjashtë deputetët e parë të çdo partie do të jenë nga listat e mbyllura, aty ku renditjen e ka përcaktuar partia dhe votuesi nuk mund të ndikojë. Vetëm për ato parti, që do të fitojnë mandate përtej listës së mbyllur, do të kenë mundësi të fusin në Kuvend, deputetë nga lista e hapur, aty ku renditjen e përcaktojnë zgjedhësit.
Dokumenti i KQZ ka llogaritur sipas qarqeve, se si ndahen mandatet në lista të fiksuara dhe në lista të hapura.
Sipas kësaj skeme, partitë e vogla nuk do të kenë thuajse asnjë deputetet që vjen nga lista e hapur, por vetëm nga ato të mbyllura.
Për 11 majin, secila partia/koalicion do të garojë me 46 deputetë në listë të mbyllurdhe 140 të tjerë në listë të hapur.
Sipas qarqeve, në Berat, për çdo subjekt fitues,2 deputetët e parë do të zgjidhen nga lista e fiksuar, dhe 5 nga lista e hapur.
Në Dibër, 2 fituesit e parë do të jenë të listës së mbyllur, dhe 3 nga e hapura.
Në Durrës, 5 deputetët e parë dalin nga lista e fiksuar, 9 nga lista e hapur.
Në Elbasan do të jenë 5 nga 15 mandate të mbrojtura në listë të mbyllur.
Në Fier, 5 nga 16 emrat, do të jenë të mbyllur.
Gjirokastra ka vetëm 1 emër në listë të mbyllur nga 4 mandate gjithsej.
Korça ka në listë të fiksuar, 3 nga 10 mandate për çdo subjekt zgjedhor.
Kukësi do të ketë 1 mandat të fiksuar, Shkodra 4 të tillë.
Në Tiranë, 12 fituesit e parë do të merren nga lista e mbyllur.
Vlora do të ketë 4 deputetë në listë të sigurt nga 12 mandate gjithsej.
Sipas Kodit, për çdo parti garuese, mandat do të fitojnë të parët ata që janë në listën e mbyllur, dhe brenda listës së mbyllur do të respektohet renditja e paracaktuar nga kryetari i partisë.
Nëse partia/koalicioni fitojnë mandate në atë qark, më shumë se sa ka emra lista e mbyllur, atëherë do të fitojnë mandat sipas radhës, më të votuarit nga lista e hapur.
Renditja në listë të hapur bëhet pa asnjë prag, kush ka marrë një votë më shumë, por 1 në 3 emra, do të jetë femër, edhe nëse zonjat nuk janë votuar sa duhet në zgjedhje.
