Një çmim stratosferik, i paimagjinueshëm më parë, raportohet nga Korça në lidhje me drutë.
Drutë e zjarrit për ngrohje, që në zona si Korça, janë tepër të nevojshme për dimrin. Çmimi i lartë i energjisë, fashat e vendosura, kanë bërë që në Korçë të ruhet zakoni i ngrohjes me dru. Prej shumë vitesh çmimi ka pësuar rritje, dikur 15 mijë lekë të vjetër, sot ka arritur rekordin historik prej 85 mijë lekësh për metrër kub.
Problemi nuk qëndron vetëm te çmimi stratosferik, por edhe te mungesa e tyre.
Jo vetëm çmimi është trefishuar brenda vitit. Ka një mungesë të theksuar të lëndës drusore djegëse, për të furnizuar familjet në Korçë.
Moti disi i ka favorizuar qytetarët, por çmimi vazhdon të jetë stratosferik, dhe ka një mungesë të madhë në dru. Në fakt, në disa zona rreth e rrotull qytetit, në Vithkuq, në Kolonjë etj., ka sasi të mëdha drush, por me sa duket, pengesat e bëra nga kryebashkiaku i Kolonjës, apo pengesat e tjera që vijnë nga bllokimi që bën policia, i furnizuesve me dru zjarri, ka sjellë një shtrenjtim të çmimit në treg, por dhe një problematikë të re sociale për qytetarët e Korçës.
Një problematikë e madhe sociale, një familje që të nxjerrë dimrin në Korçë, nuk do të mundet kurrë pa 10 deri në 12 metër kub dru, pra do të duhen nga 850 mijë deri në 1 milion lekë të vjetër, për një familje me dy pensionistë, kjo është thuajse një çmenduri, sepse një pension prej 200 mijë lekësh të vjetër, çfarë do të bëjë më parë pensionisti: Do të blejë një metër dru? Do të blejë ilaçet? Do të paguajë dritat? Do të paguajë ujin? Apo do të ushqehet?Shumë e rëndë është situata edhe për familjet të cilat kanë një punë, pra nuk janë në pension, me një pagë mesatare si ajo që deklaron vetë qeveria, sërish gati 20% apo deri 30% e saj, e do një metër kub dru, pa folur për kostot e tjera të energjisë, të ujit, ushqimet veshjet e të tjera.
Çmimi prej 85 mijë lekësh për metër kub në Korçë po shkakton një problmatikë të madhe sociale në qytet, ndërkohë që në vendet rreth Korçës, çmimi është shumë më i ulët, kemi këtu parasysh Maqedoninë e Veriut apo dhe në Kosovë dhe theksojmë se problematika shfaqet vetëm në qytetin e Korçës.
Pasi në Dibër dhe në Kukës dhe në zonat e tjera të veriut, çmimet janë më të ulëta se në Korçë, kjo për shkak edhe të asaj që theksuam më lart, bllokimit që i është bërë shpërndarjes së druve nga policia e qarkut të Korçës, por dhe sjellja abuzive, arrogante dhe korruptive e kryebashkiakut të Kolonjës, i cili ka penguar që kjo bashki të bëjë furnizimin me lëndë djegëse të Korçës dhe zonat përreth.
