Zbardhen shumë detaje mbi operacionin e fundit të SPAK-ut, lidhjet, përplasjet, aleancat dhe skenarët e vrasjeve, mes grupeve apo bandave kriminale.
Të tjera detaje tronditëse dalin në “dritë” nga planet për vrasje që thurte Vis Martinaj për vëllezërit Duka, por edhe të këtyre të fundit për eleminimin e “mbretit të kumarit”. Kush janë vajzat që do përdoreshin si karrem dhe kush fshihet pas pseudonimeve ‘Boli’ e ‘Olsi’
Vëllezërit Duka vihen në ndjekje të Martinaj dhe kërkojnë jo vetëm kokën e tij, por edhe të një prej pjesëtarëve të grupit të tij kriminal, Erigers Mihasit.
Dosja Hetimore
Leonard Duka dhe Ervis Martinaj kanë pasur shoqëri prej rreth 15 vitesh me njëri-tjetrin dhe kanë bashkëpunuar me qëllim zhvillimin e biznesit në fushën e lojrave të fatit si dhe në administrimin e bizneseve të llojit, hotele, lokale në zonën e ish-Bllokut dhe të tjera të Tiranës.
Po kështu këta dy shtetas kanë bashkëpunuar edhe me qëllim zhvillimin e aktivitetit të paligjshëm të trafikut të narkotikëve me qëllim përfitimi.
Por duket se kjo shoqëri mori fund pasi dhunimit që Santiago Malko, miku i Ervis Martinaj, i bëri babait të Leonard Dukës.
Duka që mesa duket nuk ia fali Malkos, këtë poshtërim.
Por organizoi vrasjen e tij, që nuk vonoi.
Dosja Hetimore
Konflikti midis Dukës dhe Martinaj ka nisur për shkak të një debati që Leonard Duka ka pasur me Santiago Malkon, shtetasin e vrarë me datë 27 Gusht 2019 në Tiranë.
I cili rezulton se ka dhunuar babain e Leonardit, shtetasin Muhamed Duka.
Santiago Malko që dyshohet se ishte i përfshirë në aktivitete të paligjshme ne fushën e trafikimit të narkotikëve dhe krimeve kundër jetës ishte lidhje e ngushtë e Ervis Martinaj dhe Erigers Mihasit.
Pikërisht pas vrasjes së Santiago Malkos, Ervis Martinaj bën përgjegjës për ekzekutimin e mikut të tij Leonard Dukën dhe lidhjet e tij.
Nga ku Martinaj fillon të investohet për të vrarë vëllezërit Leonard dhe Erlis Duka dhe lidhjet e tyre shoqërore.
Ndërkohë që nga krahu tjetër këta persona investohen për të vrarë Ervis Martinajn, Erigers Mihasin dhe njohjet e tyre.
Dosja Hetimore
Nga analizimi i komunikimeve del se Fatmir Hyseni shfaqet si një person me eksperiencë në fushën e krimeve kundër jetës dhe është i angazhuar në mënyrë konstante për lokalizimin dhe vrasjen e Ervis Martinaj dhe lidhjeve të tij.
Më datë 10 Korrik 2020, Leonard Duka ka siguruar një informacion që Ervis Martinaj mund të jetë në plazh me një femër në Dhërmi tek një vend i njohur si ‘Vin Bakalli’.
Për këtë arsye ka njoftuar Fatmir Hysenin.
Dhe ky i fundit ka dërguar një person që i drejtohet me emrin ‘nipçe’ për të verifikuar këtë informacion.
Por ndërkohë që Ervis Martinaj po përgatitej të fuste në kurth Leonard Dukën, ky i fundit mëson për planin e kundërshtarit të tij.
Dhe organizohet ta zerë në befasi atë që deri dje ishte miku i tij. Por që tani ishte armiku më i betuar.
Dosja Hetimore
Në periudhën kohore duke filluar nga data 1 Gusht 2020 dhe në vazhdimësi Leonard Duka ka siguruar informacion që Ervis Martinaj ka angazhuar disa femra me qëllim për t’i afruar pranë tij që ta nxirrnin në pritë.
Për këtë arsye Leonard Duka njofton Fatmir Hysenin i cili angazhohet për planifikimin e vrasjes së personave që do të afrohen për të vrarë Leonardin.
Në këtë plan kanë marrë pjesë të gjithë pjesëtarët e grupit të drejtuar nga Leonard Duka ku ky i fundit do të luante rolin e ‘karremit’ i cili do të takohej me këto femra në një vend ku terreni është i njohur mirë nga ai vetë dhe lidhjet e tij.
Por vajzat nga Shkodra nuk erdhën në takim, dhe kështu plani duket se dështoi.
Ndërkohë që grupi i Leonard Dukës, mësoi se personi që do i fuste ata në kurth ishte Erigers Mihasi.
Edhe ky i vrarë në një atentat në Tiranë, disa kohë më pas.
Dosja Hetimore
Leonard Duka dhe bashkëpunëtorët e tij kanë dyshuar se organizatori i takimit me vajzat atë ditë do të ishte Erigers Mihasi, i njohur me pseudonimin ‘Boli’ dhe një person tjetër që dyshohet se është punonjës policie që i thërrasin me emrin ‘Olci’.
Më datë 12 Gusht 2020, Leonard Duka ka kontaktuar me femrat me të cilat do të organizonte takimin por ato nuk janë treguar të disponueshme të takoheshin në këtë datë sepse njëra ishte në Shkodër ndërsa tjetra kishte angazhime.
- Aleanca e Vis Martinajt me Ben Ndokën, çfarë i bëri bashkë “Mbretin e Kumarit’ dhe ish-deputetin e PS
historia e Ervis Martinaj, i ashtëquajturi ‘Mbreti i Kumarit’ në Shqipëri, i zhdukur pa gjurmë që nga gushti i vitit 2022 dhe Arben Ndokës, ish-deputet i Partisë Socialiste, i cili në dhjetor të vitit 2017, kishte humbur në Lezhë, një pritë të dera e shtëpisë, vëllain Aleksandër Ndoka.
Dhe për t’u hakmarrë për humbjen e vëllait lidhi një ortakëri me Ervis Martinaj, i cili edhe ky nga ana e tij kërkonte shpagim për kundërshtarët e tij, të cilët kishin shkuar shumë lart në goditjen e tyre, duke eleminuar kohë pas kohe ushtarë të rëndësishëm të ‘Mbretit të Bixhozit’.
Apo thënë ndryshe i kishin prerë krahët e armatosur Ervis Martinaj.
Por nëse deri këtu ajo që mund të bënim ishte thjesht të hamendësonim mbi atë që po ndodhte, apo të lexonim skakierën e krimit, se si ajo po rrallohej nga gurët e saj, pa kuptuar qartë se kush i lëvizte apo po kush i hante figurat në fushë.
Tashmë SPAK dhe Byroja Kombëtare e Hetimit, me prerjen së fundmi të 50 fletëarresteve, në kuadër të operacionit më të madh të ndërrmarrë ndonjëherë nga drejtësia të goditjes së grupeve kriminale, ka mundur të zbardhë disa nga ekzekutimet më të rënda, të ndodhura në Shqipëri, në harkun kohor të 15 viteve të fundit.
Ngjarje të cilat kishin mbetur pa autor, por që në qendër të kësaj përplasje të përgjakshme me viktima të shumta, duket se ishin krerët më të lartë të bandave në Shqipëri.
Të cilët ishin bërë bashkë kundër njëri-tjetrit, me qëllim finalizimin e plotë të hakmarrjes së tyre.
Njoftimi i SPAK
Prokuroria e Posaçme ka evidentuar kryerjen e veprave penale të rënda nga 7 grupe të strukturuara kriminale me fuqi të konsiderueshme dhe me shtrirje gjeografike të aktivitetit të tyre kriminal në disa nga qytetet kryesore të vendit si Tiranë, Durrës, Vlorë, Lezhë, Fushë-Krujë dhe Rrëshen.
Por cila është lidhja e Ervis Martinaj me grupin e Arben Ndokës, dikur ish-deputet i Partisë Socialiste, i përzënë jashtë parlamentit për shkak të ligj të dekriminalizimit.
Dhe çfarë i bëri ata bashkë, kundër klaneve të tjera kriminale.
Kush janë këto klane, që kishin shqetësuar kaq shumë rehatinë e bosit të kumarit, aq sa të ndërrmerrte një revansh.
Por që fillimisht i duhej një ortakëri.
Sipas të dhënave që disponon emisioni ‘Në Shënjestër’, menjëherë pas vrasjes së të vëllait, Aleksandër Ndoka, mëngjesin e datës 9 Dhjetor 2017, në derën e shtëpisë së tij në Lezhë, ish-deputeti socialist Arben Ndoka nisi kërkmet e tij, se kush mund të jenë autorët e mundshëm të ekzekutimit të njeriut të tij të afërt.
Edhe pse ka dyshime lidhur mbi emra të përveçëm ai nuk është ende i bindur mbi autorin e vërtetë. Pikërisht për këtë arsye ai thërret për të bërë be disa nga personazhet e botës së krimit.
Midis personazheve që iu përbetuan se nuk kishte lidhje me vrasjen e Aleksandër Ndokës ishte edhe Durim Bami, i njohur si një nga të fortët e Niklës dhe Aleksandër Deda alias Aleks Ndreka i njohur me nofkën Leksi i Druve.
Por ndërsa Arben Ndoka kishte hallet tij dhe ishte në gjuetinë për gjetjen dhe eleminimin e vrasësve të vëllait të tij, ai e kishte të pamundur ta realizonte i vetëm këtë mision.
Ndaj thërret në ndihmë Ervis Martinaj.
I cili edhe ky nga ana e tij, po shikonte se si po i ngushtohej laku dhe po i vriteshin bashkëpunëtorët një e nga një.
Dhe në pamundësi për të mbledhur forcat e pakësuara dhe dobësuara nga plumbat që po i korrnin kohë pas kohe të fortët të tij, ai vendos të lidhë një ortakëri me Arben Ndokën.
Ku pakti do të ishte, që të dy do të bashkonin fuqitë, sa herë ata do thërrisnin në armë njëri-tjetrin.
Pra një ndihmë reciproke, ku patjetër në ndihmë do vinin edhe njohjet e tyre në polici, që do i furnizonin me informacion, lidhur mbi lëvizjet e kundërshtarëve.
Dosja Hetimore
Pasi lidhën aleancë me njëri-tjetrin, këto dy grupime ranë në kontakt me grupe të tjera kriminale dhe rekrutuan vrasës me pagesë të cilët veprojnë kryesisht në zonën e Fushë- Krujës dhe atë të Burrelit.
Një nga këta kundërshtarë të përbashkët, të Ndokës dhe Martinaj, emri i të cilit ishte shënuar prej tyre me rreth të zi, ishte Durim Bami.
Një personazh i përfshirë në ngjarje të shumta kriminale, por edhe me dijeni për shumë të tjera që kanë ndodhur në këto vite.
Ku Arben Ndoka në njërin krah, për interesat të veta, dyshonte se Durim Bami ishte organizator i vrasjes së të vëllait, Aleksandrit.
SPAK
Arben Ndoka është i angazhuar me qëllim vrasjen e shtetasit Durim Bami për shkak se dyshon si autori kryesor dhe organizator i vrasjes së vëllait të tij shtetasit Aleksandër Ndoka ndodhur në Lezhë me datë 9 Dhjetor 2017. Ai shprehet se është i interesuar të vrasë Durim Bamin dhe vëllain e tij Valter Bami, por edhe persona të tjerë nëse do jenë në prezencë të tyre.
Me qëllim realizimin e vrasjes Arben Ndoka bashkëpunon me lidhjet e tij familjare dhe shoqërore.
Ervis Martinaj, nga krahu tjetër, mendonte se Bami i frikshëm, kishte lidhur aleancë me vëllezërit Leonard dhe Erlis Duka, dhe po punonte me ta që të hiqte qafe bosin e kumarit.
Pasi ky i fundit thuhet se kishte marrë peng dhe dhunuar në një garazh në zonën e Freskut në Tiranë, babain e vëllezërve Duka.
Dhe këta të fundit mendohet se vunë në tavolinë të gjithë pasurinë e tyre për të goditur Martinajn dhe grupin e tyre.
Ku në harkun kohor të pak kohëve u ekzekutuan Santiago Malko, i konsideruar si krahu i djathtë i Martinaj.
I cili u vra më 17 Gusht 2019 pranë zonës së njohur si ‘Xhamllëku’ në Tiranë.
Dhe më 13 Nëntor 2021, në Unazën e Madhe në zonën e Astirit në Tiranë, u qëllua për vdekje brenda makinës me të cilën udhëtonte, Erigers Mihasi.
Si dhe shoku i tij, Armand Dumani.
SPAK
Ervis Martinaj ka patur rolin e bashkëfinancuesit për kontraktimin e personave që do të angazhohen në realizimin e vrasjes. Ai siguronte informacion për vendndodhjen e Durim dhe Valter Bamit, dhe Gentian Koçit. Dhe këto informacione ia përcillte Arben Ndokës. Ervis Martinaj ka siguruar automjetet për ndjekjen dhe vëzhgimin e objektivit.
Pra thënë ndryshe, Martinaj do t’i përgjigjej me para ish-deputetit Ndoka, me qëllim që ai të arrinte qëllimin e tij. dhe për kokën e Durim Bamit dhe të vëllait ishin premtuar deri në 1 milionë euro.
Për të mundësuar eleminimin e sigurtë të Durim Bamit, SPAK thotë se dyshja Martinaj-Ndoka, thirrën në ndihmë njohje të tyre të vjetra në botën e krimit.
Një ndër këto personazhe, në mos ndër më të frikshmit, që ka parë bota e krimit, është edhe Emiljano Shullazi.
I cili edhe pse në burg, vendosi të bashkëpunojë me Martinajn dhe Ndokën dhe brenda në qeli siguron një telefon te ekriptuar.
Vetë Shullazi thuhet se kishte përplasje me Durim Bamin, pasi dyshonte se ky i fundit më 5 janar 2015 ishte pikërisht ai organizatori i atentatit te mbikalimi i Kasharit.
Ku u tha po ashtu se mbi Shullazin qëlloi Enver Stafuka, edhe pse ndaj tij nuk u ngrit asnjëherë akuzë. Enver Stafuka, sic thuhet iu përbetua në spital Shullazit se nuk e dinte mbi kë qelloi.
Më vonë, ai u rrëmbye dhe u zhduk pa gjurmë nga një togë me uniforma policie, vetëm pak sekonda pasi ishte ndarë nga vëllezërit Durim dhe Valter Bami, miku i tij Gentjan Bejtja dhe Ramazan Rraja nipi i ish-deputetit socialist Rrahman Rraja.
Për t’i ardhur në ndihmë aleancës kriminale, Shullazi mësohet se kontaktoi Marklen Hakën, dikur miq i ngushtë i Durim Bamit, tashmë armik i tij.
Marklen Haka i njohur si Tuku, që iu kishte mbijetuar disa atentateve, informonte Shullazin në burg për lëvizjet e dy vëllezërve Bami, automjetet që ata përdornin, vendet që frekuentonin dhe personat me të cilët shoqëroheshin. / Emisioni ‘Në Shënjestër’
