SEUL- Një zbulim i ri është bërë për aksidentin ajror që tronditi Korenë e Jugut, në të cilin humbën jetën më shumë se 170 persona. Regjistruesit e fluturimit (të ashtuquajturat kuti të zeza) të avionit nuk kanë kapur asgjë 4 minutat e fundit, pra pak para se avioni të ulej në pistë dhe të shpërthente.
Zyrtarët që hetonin aksidentin më vdekjeprurës të avionit në vend në gati tre dekada, kishin shpresuar se të dhënat nga të ashtuquajturat kuti të zeza do të hidhnin dritë mbi arsyen se përse “Jeju Air Flight 7C 2216” që vinte nga Bangkoku bëri një ulje “bark” në Aeroportin Ndërkombëtar Muan më 29 dhjetor.
Megjithatë, Ministria e Transportit e Koresë së Jugut tha të shtunën se regjistruesi i zërit të kabinës (CVR) dhe regjistruesi i të dhënave të fluturimit (FDR) i Boeing 737-800 kishin ndaluar së punuari rreth katër minuta para rrëzimit. Por po ashtu, shtuan se ishte e paqartë pse pajisjet ndaluan regjistrimin.
“Të dhënat nga CVR dhe FDR janë të rëndësishme për hetimet e aksidenteve, por hetimet kryhen duke analizuar të dhëna të ndryshme, kështu që ne planifikojmë të bëjmë maksimumin për të identifikuar me saktësi shkakun e aksidentit,”- tha ministria në një deklaratë.
Regjistruesi i zërit në kabinën e pilotit fillimisht u analizua nga autoritetet lokale dhe më pas u dërgua në Shtetet e Bashkuara për verifikim të mëtejshëm. Regjistruesi i të dhënave të fluturimit, i cili ishte i dëmtuar dhe pa lidhës, u dërgua në Bordin Kombëtar të Sigurisë së Transportit (NTSB) në SHBA javën e kaluar për analizë pasi autoritetet e Koresë së Jugut arritën në përfundimin se nuk mund të merrnin të dhëna nga pajisja për shkak të dëmtimit.
CNN ka kontaktuar me NTSB për koment.
Përplasja është më vdekjeprurja në vend që nga viti 1997, kur një Boeing 747 i Korean Air Lines u rrëzua në xhunglat e Guamit, ku u vranë 228 njerëz. Në këtë rast, përpara uljes emergjente, piloti dha lajmërimin se avioni ishte ‘përplasur’ me një tufë zogjsh. /gazetajone
