Vendimi, Shqipëria në shitje: Edhe Igli Tare merr leje për park eolik
E ardhmja e Igli Tares në Serinë A është e paqartë, pas përfundimit të kontratës si drejtor teknik i skuadrës së Lazios. Por, biznesi i tij në Shqipëri është shumë më i qartë dhe ecën me hapa të sigurt, falë mbështetjes së pakursyer të mikut të tij, kryeministrit Edi Rama.
Ish-futbollisti i njohur i kombëtares shqiptare, prej vitit 2019, ka regjistruar në vendin tonë kompaninë “Agro Roma 2019”. Shoqëria private nuk ka asnjë lidhje me futbollin apo me sportin në përgjithësi.
Objekti i aktivitetit të saj është “sporti më popullor” në vitet e fundit në vendin tonë, ndërtimi.
Në fillim të kësaj jave, kompania private e Igli Tares ka siguruar leje ndërtimi për ndërtimin e një impiakti fotovoltaik për prodhimin e energjisë elektrike në Topojë të Fierit.
Vendimi është nënshkruar nga Edi Rama, në cilësinë e kryetarit të Këshillit Kombëtar të Territorit (KKT).
Rreth dy vjet më parë, Igli Tare, me firmën e Edi Ramës, ka siguruar leje ndërtimi për ngritjen e një godine shumë-katëshe në zonën e ish-Bllokut, në Tiranë.
Nga futbollist në ndërtues
Tifozët shqiptarë e njohin si ish-kapitenin e Kombëtares së Futbollit dhe si drejtorin e suksesshëm sportiv të Lacios, në Serinë A.
Por, tashmë, Igli Tare ka vendosur të përfshihet në biznesin e ndërtimit, një prej më fitimprurësve në vendin tonë.
Në janar 2019, Igli Tare regjistron në Qendrën Kombëtare të Biznesit kompaninë “Agro Roma 2019”.
Gjithnjë referuar të dhënave zyrtare, administrator i parë i kompanisë ka qenë Aleksandra Tare, nëna e Iglit. Duke filluar nga Janari 2021, administrator i shoqërisë së Igli Tares është Soni Agalliu.
Shoqëria, siç deklarohet në dokumentat zyrtare, fillimisht ka pasur objekt të aktivitetit tregtar në fushën e prodhimeve bujqësore dhe blegtorale, tregtimin e tyre, si edhe ndërtimin e impianteve për këtë degë të ekonomisë.
Më tej, objekti i aktivitetit të kompanisë është zgjeruar, duke përfshirë edhe ndërtime.
Në 29 maj 2023, Këshilli Kombëtar i Territorit miraton disa vendime, mes të cilëve spikat ai me numër 42.
“Leje Zhvillimi për objektin: “Ndërtimin e impiantit gjenerues të energjisë elektrike fotovoltaike, me kapacitet të instaluar 2 MË, dhe veprave ndihmëse”, me vendndodhje në Topojë, Bashkia Fier, me subjekt zhvillues shoqërinë “Agro Roma 2019” sh.p.k.
Bëhet fjalë pikërisht për kompaninë në pronësi 100 përqind të ish-futbollistit të kombëtares, Igli Tare.
Pallati në Tiranë
Në 10 Qershor 2021, Këshilli Kombëtar i Territorit (KKRRT), nën drejtimin e kryeministrit Edi Rama, ka shqyrtuar, ndër të tjera, edhe lejen e ndërtimit për “Objekt me funksione komplekse, shërbimi, zyra dhe rezidenciale”, me vendndodhje Bashkia Tiranë, me zhvillues “EB Construction” sh.p.k dhe “AgroRoma 2019” sh.p.k”.
Nuk ka shumë të dhëna se ku do të ndërtohet ky kompleks rezidencial dhe se sa hapësirë do të përfshijë, pasi Këshilli Kombëtar i Territorit prej shumë kohësh ka dëshmuar një mungesë të madhe transparence.
Megjithatë, të dhënat e pakta për këtë aplikim për leje ndërtimi janë të mjaftueshme për të kuptuar se cilët janë përfituesit e saj.
Ata janë Igli Tare, ish-futbollisti dhe një prej miqve të deklaruar të Edi Ramës, si edhe Ilir Bregasi, djali i biznesmenit Luan Bregasi e njëkohësisht dhëndri i ish-Presidentit të vendit, Bamir Topi.
Shoqëria “EB Construction” është regjistruar në Prill 2019 nga Ilir Bregasi, djali i biznesmenit dhe ish-drejtuesit të Dhomës Kombëtare të Tregtisë, Luan Bregasi.
Shoqëria operon në fushën e ndërtimit të godinave civile, industriale, turistike e bujqësore.
Të dy kompanitë, ajo e Igli Tares dhe ajo e Ilir Bregasit, shfaqen bashkërisht si investitorë të kompleksit rezidencial në Tiranë. /Boldnews
