E vërteta është se mbledhja e sotme në fakt ishte një “gjyq” për Elisa Spiropalin, tregoi për Lapsi.al një burim brenda radhëve të ligjvënësve socialistë.
Revanshi i Belinda Ballukut
Në krye të goditjes së saj në sy të gjithë deputetëve ishte zv.kryeministrja Belinda Balluku. Me tone të ashpra ajo fshikulloi Spiropalin për keqmenaxhimin e seancës plenare të javës së shkuar ku u shkaktua kaos pasi mazhoranca futi me shpejtësi projektligjin për faljen e gjobave.
Balluku akuzoi Spiropalin se po favorizonte opozitën duke iu dhënë hapësirë të pamerituar dhe në shkelje të rregullores sipas zv.kryeministres. Jo vetëm kaq, por Balluku shkoi edhe më tej duke aluduar se kryetarja e parlamentit është nën një presion prej Gazment Bardhit, i cili i dikton edhe sjelljen në seancë plenare. Burimi i tha Lapsi.al se gati gati Balluku ngriti insinuata që Spiropali po shantazhohet nga kreu i Grupit Parlamentar të Partisë Demokratike.
Kujtojmë këtu që Gazment Bardhi i ka përmendur shpesh Pëllumb Gjokën kryetares së parlamentit Elisa Spiropali. E ka pyetur publikisht disa herë se çfarë dhurate ka marrë ajo nga Pëllumb Gjoka. Nuk dihet nëse Belinda Balluku ka pasur në mendje pikërisht këto akuza të Bardhit teksa fshikullonte Elisa Spiropalin. Por numri dy i qeverisë nuk ishte e vetme në këto kritika.
Sulmin e Ballukut e pasojnë të tjerë
Menjëherë si për t’i rënë në sy asaj e për t’i treguar devotshmëri dhe besnikëri, u rreshtuan Taulant Balla, Erion Braçe dhe Blendi Klosi. Gati me të njëjtën gjuhë edhe ata shpërfaqën pakënaqësitë e tyre ndaj Elisa Spiropalit.
Pati edhe qëndrime disi më të zbutura si ai i kryetarit të Grupit të PS, Niko Peleshit apo Mimi Kodhelit. I gjithë “gjyqi” u zhvillua pa praninë e vetë Elisa Spiropalit, e cila mungonte në mbledhjen e sotme të Grupit të PS. Mbase kishte zgjedhur vetë të mungonte duke e ditur se çfarë po gatuhej në prapaskenë.
Asgjë nuk ndodh pa bekimin e Ramës
Fshikullimi i sotëm që Balluku i bëri Spiropalit në sy të të gjithë grupit të PS-së nuk është një axhendë personale, aq më tepër duke e ditur që ajo është e vetmja në radhët e socialistëve që e ka lartësuar aq shumë Edi Ramën duke i thënë Skënderbe.
Sulmi nuk mund të bëhej asnjëherë pa bekimin e kryeministrit që mungonte gjithashtu në mbledhjen e grupit. Askush nuk është i luajtur mendsh në PS sa që të ngrejë krye kundër Kryetares së Kuvendit në sy të të gjithë grupit parlamentar pa pasur më parë dakordësinë e Edi Ramës.
Këtë nuk do ta guxonte as Belinda Balluku e jo më pastaj personazhe periferike si Erion Braçe apo Taulant Balla. Gjithçka duket e orkestruar prej vetë “Skënderbeut” kundër “Mamicës” së tij. Arsyet mbeten ende të paqarta!
Njëri që e ka kuptuar ç’po ndodh dhe pushtetin e mash të Belës është Taulant Balla.
Në mbledhjen me dyer të mbyllura të PS-së të së martës, Balla u rreshtua në krah të Ballukut, kur kjo e fundit kritikoi me një gjuhë të ashpër kryetaren e Kuvendit, Elisa Spiropali, me pretendimet se ishte nën shantazhet e Gazment Bardhit, që e orienton për drejtimin e seancave plenare.
Bindja ndaj Ballukut (që tregon se nuk bëhet fjalë për një aleancë, por për nënshtrim) janë postimet në rrjetet sociale.
Zv.Kryeministrja dhe ministrja e Infrastrukturës postoi ditën e martë një video me borëpastruese në zonën e Thethit.
Të njëjtën video, pak orë më vonë e poston në rrjetet e tij sociale Taulant Balla.
Postimi i videos nga Belinda Balluku, që është edhe ministre e Infrastrukturës deri diku kuptohet me zellin për të përditësuar ndjekësit e saj, edhe pse mes komenteve kishte edhe nga ata që i kërkonin z.Kryeministres që të mos bënte brigadieren, por të mbante premtimet e bëra në zgjedhjet e vitit 2021.
Ajo që nuk kuptohet është se çfarë e lidh Taulant Ballën me gjendjen e rrugëve?
Ai është ministër Shteti për Marrëdhëniet me Parlamentin dhe drejtues politik për diasporën. Rrugët nga qeveria për në Kuvend dhe nga Shqipëria për në diasporë nuk kanë nevojë për borëpastruese.
Këtë e vënë re edhe ndjekësit e vëmendshëm të Ballës, ku njëri prej tyre i kërkon që të mos marrë rolin e shefit të emergjencave, por të luftojë korrupsionin.
