Ish deputeti biznesmen Artan Gaçi, bashkëshort i ish-ministres dhe aktualisht deputete e Partisë Socialiste Olta Xhaçka, ishte pjesë e një denoncimi në emisionin e Rai 3 në Itali.
Sipas emisionit italian Gaçi është i përfshirë në afera, kësaj radhe me djalin e një ministri të qeverisë Meloni. Në realitet emri i zotit Gaçi është përfolur edhe në disa afera të tjera, për të cilat kryebashkiaku i Himarës Jorgo Goro ka përfunduar pas hekurave, ndërsa dy bashkëshortët janë nën hetim nga SPAK.
Por në këtë dosje një rol jo pa rëndësi luan edhe Artan Gaçi, i cili shfaqet në disa përgjime.
Por përtej këtyre bisedave, të tjera komunikime brenda dosjes 184 janë ende të papublikuara.
Mes tyre dhe një telefonatë e regjistruar që ka për protagonistë Artan Gaçin dhe Ymer Lalën. Periudha në të cilën po flasin duket se është gjatë dhe pas fushatës elektorale për zgjedhjet e pjesshme vendore në bashkinë e Dibrës. Thuajse të gjitha bisedat mes të dyve kanë të bëjnë me ecurinë e procesit të zgjedhjeve dhe me pritshmëritë tek rezultati që presin të marrin. Dy bashkëbiseduesit përveçse ndajnë halle votash, flasin edhe për personin që nuk guxojnë t’i përmendin as emrin.
Pra Ai, që kuptohet fare qartë se kush është, ka raporte direkte me një personazh kontrovers, që edhe nga bisedat duket se kontrollon dhe ruan votën e socialistëve në zonën e Dibrës.
Nuk është e vështirë të kuptohet se e gjithë fushata elektorale në Dibër, është e bazuar në performancën e Ymer Lalës, i cili komunikon si vëlla me Artan Gaçin.
Këto biseda mes Agaçit dhe Lalës, janë vetëm një pjesëz fare e vogël e gjithë asaj çfarë ka ndodhur në Dibër dhe që janë bërë pjesë e dosjes së famshme 184, ku dyshohet për lidhje të forta të krimit të organizuar me politikën. Kjo dosje e cila ka brenda saj fakte të pakontestueshme të tjetërsimit të votës në Dibër, është mbyllur nga drejtësia për pamjaftueshmëri provash. Por indiciet janë që Spaku ta marrë edhe njëherë në dotë këtë patate të nxehtë, e cila nxjerr zbuluar kryeministrin dhe eksponentë të rëndësishëm të Partisë Socialiste. A do të ndodhë kjo? Mbetet të presim. /Piranjat
