“Lëvizja Bashkë” nuk do të ndalet në protestat kundër prishjes së parkut pas Teatrit të Operës dhe Baletit për ndërtimin e kullës 64-katëshe që dyshohet se financohet nga njerëzit e “Foltores”. Protesta e radhës do të mbahet pasditen e së enjtes, në orën 18.30.
Njoftimi i “Lëvizjes Bashkë”:
PROTESTA NUK NDALET
Dy protestat e para kanë tërhequr vëmendjen e qytetarëve të Tiranës për krimin urbanistik që po ndodh me prishjen e parkut pas Teatrit të Operës dhe Baletit. Qindra qytetarë kanë marrë pjesë në to dhe shumë të tjerë janë informuar nga fushata ndërgjegjësuese intensive e aktivistëve të Lëvizjes BASHKË.
Ndonëse muaj pushimesh, i zgjedhur tinëzisht nga oligarkët dhe pushtetarët, qytetarët e Tiranës po tregojnë kundërshtinë e tyre ndaj përvetësimit të hapësirës publike, zhdukjes së gjelbërimit dhe ndotjes së ajrit.
Lëvizja BASHKË vazhdon me këmbëngulje të thërrasë qytetarët në protestë, e bindur se vetëm masiviteti i rezistencës mund ta shpëtojë parkun.
Ne luftojmë për jetën!
Ne angazhohemi për qytetin!
Ne përpiqemi BASHKË!
Ju ftojmë të na bashkoheni sërish, më të shumtë e të vendosur, në protestën e ditës së enjte, 10 gusht, aty ku sot është një vend krimi, por nesër mund të bëhet një hapësirë shprese!
Takohemi në parkun tonë!
