Me rritjen e temperaturave, kujdesi ndaj shëndetit dhe nevoja për të qëndruar sa më të freskët janë gjithnjë e më urgjente.
Në këtë periudhë të vitit rekomandimet e mjekëve janë të qëndroni larg të nxehtit përvëlues të verës.
E teksa termometri shënon rritje dita ditës duke kaluar 35 gradë celsius, përveç djersitjes trupi mund të vuajë edhe nga disa simptoma të tjera.
Në këtë artikull AgroWeb.org ju tregon se çfarë sëmundjesh mund të shkaktojnë temperaturat e larta.
Cilat Janë Sëmundjet Që Shkakton i Nxehti
Sëmundjet e shkaktuara nga i nxehti shfaqen kur trupi nuk është në gjendje të kryejë procesin e vetë-ftohjes.
Zakonisht trupi i njeriut ftohet me anë të djersitjes dhe qarkullimit të gjakut.
Gjithsesi kur temperaturat janë shumë të larta, as ky proces nuk është i mjaftueshëm.
Kështu trupi mund të zhvillojë gjendje të ndryshme të cilat kthehen në sëmundje.
Këtu përmendim që nga djegiet e lëkurës, deri tek hipertermia apo siç quhen ndryshe goditjet nga i nxehti.
Nëse me rritjen e temperaturave keni vënë re se ju dhembin muskujt apo keni kriza të vazhdueshme të gjymtyrëve, arsyeja mund të jetë vapa e madhe.
Gjithashtu i nxehti ndikon shumë keq edhe tek personat që vuajnë nga sëmundjet kardiovaskulare.
Pasi vështirësojnë qarkullimin e gjakut duke e ngadalësuar apo përshpejtuar atë.
Sipas Organizatës Botërore të Shëndetit të cilës i referohet AgroWeb.org, temperaturat e larta mund të bëhen shkak për përkeqësimin e sëmundjeve të veshkave, trurit dhe atyre të frymëmarrjes.
Ndikimi i temperaturave në shëndet mund të jetë vdekjeprurës, sidomos nëse vuani nga sëmundje kronike.
Pasi i nxehti ka tendencë të bllokojë dhe ngadalësojë shumë procese normale të organizmit, duke u kthyer në një rrezik për jetën.
Kush Janë Më të Rrezikuarit
Ekspertët thonë se çdo njeri mund të jetë i rrezikuar nga sëmundjet e mësipërme nëse ekspozimi në diell është shumë i madh.
Gjithsesi më delikatë gjatë verës ndaj këtyre problemeve janë një grup i caktuar njerëzish.
Të moshuarit, kryesisht sipër moshës 65 vjeç nuk këshillohet të qëndrojë jashtë gjatë ditëve të nxehta.
Të porsalindurit, lehonat dhe gratë shtatzënë gjithashtu janë të rrezikuar nga temperaturat e larta të verës.
Mjekët theksojë se personat që vuajnë nga sëmundje kronike ku futen ato kardiovaskulare, diabeti apo sëmundjet e frymëmarrjes për shkak se gjatë kësaj kohe marrin medikamente të forta janë gjithashtu një grup në rrezik.
Çfarë të Bëni Nëse Sëmureni Nga i Nxehti
Ndihma e parë që mund t’i jepni vetes dhe të tjerëve në këtë rast është të lëvizni në një vend më të freskët dhe të errët.
Përpiquni të ftohni kyçet e gjymtyrëve dhe të konsumoni ujë të freskët.
Në këtë mënyrë trupi do të rregullojë temperaturën e brendshme të tij.
Nëse jeni në shtëpi mjekët këshillojnë që të bëni një dush me ujë të freskët.
Evitoni daljen nga shtëpia gjatë orëve kur dielli është shumë i nxehtë dhe evitoni pijet alkoolike apo kafen.
Është e rëndësishme që të jeni të kujdesshëm me simptomat, nëse ndjeni se po përkeqësohen njoftoni menjëherë një mjek.
