Nënkryetari i Hamasit, Saleh Al Arouri, një nga militantët më të kërkuar të Izraelit, e la veten të ekspozuar në Bejrut, kur zhvilloi një takim me zyrtarë të tjerë të lartë të Hamasit, në një zyrë që aleatët e tij i kishin paralajmëruar në mënyrë specifike kundër përdorimit, ka mësuar The National. Në fillim të janarit, zyrtari i lartë dhe gjashtë të tjerë u vranë në një sulm izraelit në një ndërtesë që strehonte një zyrë të Hamasit në periferi të Bejrutit, ku disa liderë në mërgim të grupit palestinez banojnë nën mbrojtjen e Hezbollahut.
Hamasi, Hezbollahu, Irani dhe të tjerë akuzuan Izraelin për vrasjen e Al Arourit, për të pretenduar një fitore shumë të nevojshme kundër grupit të armatosur, ndërsa ushtria izraelite lufton për të mposhtur luftëtarët e Hamasit në Rripin e Gazës, pavarësisht nga sulmet e pamëshirshme ajrore dhe tokësore që kanë vrarë mijëra njerëz, shumica civilë.
“Të shkosh në ndërtesë ishte një veprim i pamatur. Ai nuk duhet të kishte shkuar atje”, tha një zyrtar i lartë libanez për The National. Z. Al Arouri u vra në apartamentin e tij në Dahieh, një periferi jugore rezidenciale në Bejrut. Z. Al Arouri, i cili për vite kishte qenë në listën e vrasjeve të Izraelit dhe konsiderohej si një nga njerëzit më të kërkuar në Lindjen e Mesme, kishte jetuar në Dahieh që nga viti 2015. Një paralajmërim nga Hezbollahu kundër përdorimit të asaj ndërtese specifike ishte dorëzuar më pare, pasi grupi i mbështetur nga Irani dyshoi se vendndodhja e tij ishte komprometuar nga inteligjenca izraelite.
“Hezbollahu madje kishte dhënë një paralajmërim me shkrim, për të siguruar që zyra e Hamasit të mos përdorej”, shpjegoi zyrtari i lartë libanez me lidhje të ngushta me Hezbollahun dhe Hamasin. Përdorimi i zyrës nga zoti Al Arouri e la atë të pambrojtur ndaj atentatit.
Për më tepër, grupi i zyrtarëve të Hamasit kishte sjellë telefonat e tyre, duke i vënë ata në rrezik të mbikëqyrjes izraelite. “Gjithsej, ishin shtatë telefona në atë takim,” shtoi zyrtari me njohuri të thella të aparatit të sigurisë të Libanit. Zyra ishte gjithashtu e pajisur me të paktën një kompjuter me një lidhje Wi-Fi, duke u dhënë potencialisht forcave izraelite një tjetër metodë për gjetjen e burrave.
I pyetur nëse kishte dyshime se një aktiv i inteligjencës mund të ketë luajtur një rol në dhënien e informacionit të zyrtarëve izraelitë rreth takimit, ai tha se “prania e kaq shumë telefonave është e mjaftueshme, që Izraeli të përcaktojë vendndodhjen e dikujt”. Hezbollahu e konfirmoi informacionin për The National.
“Ne i kishim paralajmëruar ata që të mos përdorin zyrën”, tha një zyrtar i grupit, mbështetur nga Irani. Nuk ishte menjëherë e qartë pse zyrtarët e Hamasit do të përdornin një zyrë që ishte komprometuar potencialisht, ose pse ata do të sillnin pajisje celulare në takim. National kontaktoi disa zyrtarë të Hamasit për koment, por nuk mori asnjë përgjigje.
Raportet Hamas-Hezbollah dhe sulmi ajror izraelit
Z. Al Arouri, së bashku me një numër zyrtarësh të lartë të Hamasit, që jetonin në mërgim në Liban, banonin në periferinë jugore të Bejrutit nën kujdesin e grupit Hezbollah. Hamasi, i cili qeveris Rripin e Gazës, është një aleat i vjetër i Hezbollahut. Z. Al Arouri – i cili ishte kreu i Hamasit në Bregun Perëndimor të pushtuar dhe zëvendësi i liderit politik të Hamasit, Ismail Haniyeh – ishte veçanërisht i afërt me Hezbollahun dhe vlerësohet se kjo ka ardhur me forcimin e marrëdhënieve midis dy grupimeve.
Në dhjetor, një zyrtar i Hamasit i tha The National se një goditje ndaj anëtarëve të udhëheqësve të grupit në Dahieh nuk ka gjasa të ndodhë, pasi do të sinjalizonte një përshkallëzim të madh në territorin e Hezbollahut. Hezbollahu është i përfshirë në një konflikt intensiv ndërkufitar me Izraelin nga Libani jugor në mbështetje të aleatit të tij, që kërcënon të përhapet në pjesën tjetër të Libanit. Grupi tha se konflikti me Izraelin në kufirin Liban-Izrael është një përpjekje për të devijuar objektivat e Izraelit – i cili është zotuar të zhdukë Hamasin pas sulmeve të 7 tetorit.
Z. Al Arouri u vra së bashku me dy liderë të lartë në krahun e armatosur të Hamasit, Brigadat Ezzedine Al Qassam: kreu i operacioneve ushtarake jashtë Gazës, Azzam Al Aqra dhe shefi i operacioneve të Libanit, Samir Fendi. Sulmi vrau katër anëtarë të tjerë të organizatës: Mahmoud Zaki Shaheen, Mohammed al-Rayes, Mohammed Bashasha dhe Ahmed Hamud.
Vrasja fillimisht u mendua të ishte një sulm me dron në ndërtesën e banimit ku ndodhet zyra e Hamasit, por vlerësimet e fundit të sigurisë tregojnë se ka shumë të ngjarë të ishte një sulm i saktë, qëlluar nga lart. Zyrtarët libanezë të sigurisë dyshojnë se një avion vjedhurazi, si një F-35, qëlloi raketa të drejtuara me saktësi në ndërtesë.
“Ishte një avion që nuk u kap në radarët tanë,” tha për The National një zyrtar i sigurisë me njohuri për hetimin libanez për atentatin. “Radarët që kemi janë radarë civilë – ne nuk kemi aftësi radari ushtarak që mund të zbulojë praninë e avionëve stealth.”/The National
