Një ish-punonjës i miliarderit Elon Musk ka dërguar një mesazh paralajmërues për punonjësit e ri të Twitter. Në një intervistë për Bussines Insider, Jim Cantrell shprehet se të punosh me Musk është si të punosh me dy personalitete dhe njerëz të ndryshëm “Elonin e mirë dhe Elonin e keq”.
Intervista e plotë e Jim Cantrell në Bussines Insider:
Kam punuar për Elon Musk në ditët e para të SpaceX. Ekzekutivët e Tëitter duhet të jenë gati të punojnë me 2 njerëz të ndryshëm: Elonin i mirë dhe Elonin e keq.
Kur Elon më telefonoi për herë të parë në 2001, nuk e dija se kush ishte – nuk kisha dëgjuar kurrë për PayPal. Në atë kohë, unë punoja si pjesë e ekipit të inxhinierisë hapësinore në Universitetin Shtetëror të Utah. Ai shpjegoi përmes telefonit se ishte një miliarder në internet dhe donte të provonte se njerëzit mund të ishin një specie ndërplanetare.
Eloni donte të blinte raketa ruse sepse ishin më të lira se raketat amerikane dhe më kishin thënë se isha ai që do të pyesja sepse kisha punuar me rusët.
Ne, me administratorin e ardhshëm të NASA-s, Mike Griffin, udhëtuam për në Moskë dhe na përcollën prej andej duke na marrë në lojë e duke qeshur me ne.
Eloni ishte në fund të të 20-ave, i veshur keq dhe mjaft i sikletshëm. Ai ishte shumë i zgjuar dhe shumë i vendosur, por edhe njerëzit në SHBA mendonin se ai ishte thjesht një fëmijë i pasur që donte të dilte në hapësirë.
Ne ishim në aeroplanin e kthimit dhe Eloni u kthye nga ne dhe tha: “Unë mendoj se mund ta ndërtojmë vetë këtë raketë”.
Ne s’ishim të bindur, por ai na tregoi një tabelë me të cilën kishte punuar me Tom Mueller dhe Chris Thompson – inxhinierë që ishin gjithashtu pjesë e ekipit bashkëthemelues të SpaceX. Ato ishin planet fillestare për Falcon 1, automjeti i parë i ndërtuar nga SpaceX, dhe më lanë përshtypje.
U lodha duke u marrë me jo-efikasitetin e qeverisë. Planet që më tregoi Eloni ishin emocionuese.
Planifikova të shihja se ku do të më çonte kjo gjë për një vit apo më shumë. Unë isha nënkryetar i zhvillimit të biznesit të SpaceX nga dhjetori 2001 deri sa u largova në shtator 2002. Elon dhe unë u konfliktuam shumë. Ai më bërtiti disa herë dhe do të më duhej të ndryshoja kush isha që të vazhdoja të punoja atje.
Të punoje me Elonin ishte si të punoje me dy njerëz të ndryshëm: Elonin e mirë dhe Elonin e keq, dhe kurrë nuk e dinit se me cilin do të përballeshit atë ditë.
Eloni i mirë ka shumë humor dhe është sharmant. Ai ju merr me vete në idetë e tij të mëdha dhe ju bën pjesë të tyre.
Eloni i keq do t’ju bërtiste dhe do të ishte tejet i frustruar. Askush nuk ishte mjaftueshëm i mirë apo i aftë për të; asgjë nuk ishte mjaftueshëm e mirë për të.
Një herë, ai më thirri në orën 3 të mëngjesit duke kërkuar të dinte se ku isha sepse ishte në zyrë. Unë i thashë: “Unë shkova në shtrat tre orë më parë – kam nevojë për më shumë gjumë se kaq.” Ai donte që unë të shkoja menjëherë në zyrë, sepse kishte punë për të bërë.
Eloni nuk do të priste që ju të bënit diçka që ai vetë nuk e bën, por kufijtë dhe limitet që ai është i gatshëm të arrijë janë të pazakonta për shumicën e njerëzve. Unë dyshoj se e njëjta gjë do të ndodhë në Tëitter – nga forca e plotë e vullnetit mendoj se ai do të rrisë produktivitetin atje.
Një veçori tjetër e punës me Elonin ishte se ai kishte gjithmonë një vizion. Me SpaceX duhej të kishte njerëz në Mars. Ai priste që ju të ishit 100% në linjë me këtë objektiv. Ishte gjithmonë e qartë në mendjen e tij, por jo gjithmonë ua bënte të qartë punonjësve të tij. Kishte shumë hamendësime.
Më kujtohet kur po ndërtonim tanke për raketën dhe u grindëm. I kisha dhënë atij një vlerësim për tanket, me mirëkuptimin që do t’i ndërtonim vetë, dhe ai mendoi se ishte shumë e shtrenjtë. Ai më ulëriti dhe ishte shumë i mërzitur.
Ai më bëri të shkoja në Salt Lake City dhe të shikoja rezervuarët e kamionëve në autostradë si dhe në një fabrikë lokale çeliku për t’i hulumtuar këto tanke dhe për të parë nëse mund t’i kontraktojmë ato. Nuk ishte se ai nuk i besoi gjykimit tim; ai thjesht e dinte se kishte një mënyrë tjetër për t’iu qasur problemit.
Mësova shumë, por ndjeva mungesë respekti. Nuk kisha nevojë të më paguanin për të bërtitur, kështu që u largova. Ka njerëz në Tëitter që do të duhet të vendosin nëse janë 100% në linjë me misionin e Musk për të.
Nëse ka punonjës që nuk përputhen me atë vizion, ai do t’i gllabërojë ata dhe do ta bëjë atë në një mënyrë të egër, e cila është e drejta e tij si pronar. Nëse jeni në përputhje me vizionin e tij dhe jeni imun ndaj një shefi shumë të ashpër, i cili kërkon shumë nga koha dhe mendimet tuaja, atëherë do të jetë një udhëtim shumë argëtues. Varet nga ajo që njerëzit duan në jetë – jo të gjithë e shohin karrierën e tyre si gjënë më të rëndësishme. Është emocionuese të jesh pjesë e vizionit të Elon Musk.
Ai mbante fjalime gjatë gjithë kohës gjatë takimeve se sa e rëndësishme ishte puna jonë në SpaceX, dhe unë e shoh atë duke e bërë këtë në Tëitter. Këto fjalime janë të dobishme për t’ju frymëzuar dhe çuar përpara.
Ky është Eloni i mirë. Eloni i keq i shkarkon të gjithë drejtuesit. Ai mund të jetë i egër – ai është shumë i aftë për këtë.
Musk, njeriu më i pasur në botë, e ka blerë Twitterin në vlerë të 44 miliardë dollarëve amerikanë. Miliarderi ka thënë se të gjithë atyre që kanë humbur vendet e punës, u janë ofruar pagesa shtesë tremujore “çka është 50 për qind më shumë sesa që parashikohet me ligj”. Pas raportimit të këtyre zhvillimeve, janë rritur shqetësimet për të ardhmen e punëtorëve që janë përgjegjës për të menaxhuar informacionet e dëmshme. Grupet për siguri online kanë sugjeruar se Musk mund të relaksojë politikat, ashtu që Twitter të jetë më pak efektiv në luftimin e gjuhës së urrejtjes dhe dezinformimit. Edhe ndalesat e përhershme ndaj figurave, sikurse ish-presidenti amerikan, Donald Trump, do të mund të hiqen.
