Dy javët e fundit, qeveria e Malit të Zi ka intensifikuar ndjeshëm fushatën e saj për domosdoshmërinë e dhënies me koncesion të aeroporteve malazeze dhe pse do ta bëjë këtë, nuk ka asnjë arsye. Synimi i qeverisë dhe kryeministrit Dritan Abazoviç është që fillimisht të jepet me koncesion aeroporti Tivarit dhe më pas ai i Podgorivës. Dhe kujt do t’i jepen me koncesion është pyetja? Biznesmenit kontrovers shqiptar, Shefqet Kastratit, pronarit të kompanisë “Kastrati Group”, raporton portali malazez M.
Kastrati është një nga bashkëpunëtorët më besnikë të kryeministrit Edi Rama. Falë lidhjeve të ngushta me Ramën, kompania e tij fiton qindra tenderë të qeverisë shqiptare si dhe pushtetet vendore në vendin fqinj, përmes të cilave fiton qindra miliona euro.
Kastrati, gjatë muajve të fundit ka vizituar disa herë Malin e Zi, herën e fundit rreth 10 ditë më parë, ndërsa vizita e radhës është planifikuar për ditët para ose pas nënshkrimit të Marrëveshjes me Kishën e Serbisë. Më pas do të finalizohen negociatat për aeroportin, pasi autoritetet kanë vlerësuar se do të jetë një kohë me tensione të rritura për shkak të kontratës dhe se askush nuk do t’i kushtojë shumë rëndësi çështjeve ekonomike, sado të mëdha të jenë ato.
Ishte Rama ai që e lidhi Abazoviçin me Kastratin, tregtarin më të madh të naftës në Shqipëri dhe prej dy vitesh pronarin e aeroportit të vetëm ndërkombëtar në Shqipëri “Nënë Tereza”. Kastrati do të ishte përgjegjës i vetëm për të gjitha punët e tij të ardhshme në Mal të Zi ndaj të dyve, dhe planet e tij janë të mëdha.
Mbledhja e Bordit të drejtorëve të Aeroportit të Malit të Zi, shkarkim i mundshëm i Goran Jandreoskit
Për të realizuar marrëveshjen me Kastratin lidhur me koncesionet e aeroporteve, Qeveria e Abazoviçit në seancën e 8 korrikut shkarkoi Bordin e mëparshëm të Drejtorëve të Ndërmarrjes Publike Aeroportet e Malit të Zi dhe emëroi një përbërje të re, të kryesuar nga Eldin Dobarzic, anëtar i partisë së Abazovicit. Anëtarë të tjerë të rinj të Bordit të Drejtorëve janë Kemal Purisic (Partia Boshnjake), Slavko Vukcevic (SNP), Momçilo Martinovic (DPS) dhe Nebojsa Gjokovic (DF). Bordi i drejtorëve do të takohet sot në ora 11:00 dhe, sipas informacioneve të portalit M, në rend dite mund të jetë edhe nisja e procedurave për shkarkimi e drejtorit ekzekutiv të GSHQ-së, Goran Jandreoski.
Plani është që të zëvendësohet me një drejtor ekzekutiv që do të jetë më i “bindur” se Jandreoski, një njeri me eksperiencë të gjerë në aviacionin civil, i cili nuk ka dashur t’i plotësojë dëshirat politike të Bordit të mëparshëm të Drejtorëve, ndaj konflikti i heshtur ka qenë I vazhdueshëm që nga zgjedhja e tij. Qeveria ka nevojë për një person të besueshëm për atë post, i cili do të bashkëpunojë ngushtë me ta dhe me Shefqet Kastratin, në procesin e dhënies së aeroportit me koncesion.
Plani i Ramës dhe Abazoviçit është të investojnë sa më shumë kapital shqiptar në Mal të Zi dhe për rrjedhojë këmbëngulja e tyre për procesin e Hapur Ballkanik, sepse nëpërmjet mekanizmave të tij do të ishte dukshëm më e lehtë për ta vënë atë në praktikë. Biznesmenët shqiptarë do ta vendosnin kapitalin e tyre në Mal të Zi përmes “Kastrati Group”.
Çfarë i ka premtuar Abazoviç, Kastratit?
Sipas burimeve të sigurta të portalit M, Abazoviç gjatë takimit i ka premtuar Kastratit se bashkë me koncesionin e aeroportit do t’i mundësojë lokacione dhe leje për ndërtimin e pikave të karburantit në Mal të Zi, që është biznesi parësor i Kastratit edhe në Shqipëri. Kryeministri malazez i premtoi biznesmenit shqiptar komunikim të drejtpërdrejtë me Ministren e Ekologjisë, Planifikimit Hapësinor dhe Urbanizmit, Ana Novakoviq Gjuroviç, detyrë e së cilës është të sigurojë vendndodhje dhe leje për ndërtimin e pompave, si dhe me ministrin e Zhvillimit Ekonomik dhe Turizmit Goran Gjuroviç, i cili do të ndihmonte me lejet e importit të naftës.
Abazovic ka lidhur Kastratin edhe me kryetarin e Bordit Drejtues të Ndërmarrjes Publike Morsko dobro, Blazo Ragjenoviç, i cili së bashku me biznesmenin do të vizitojnë disa lokacione në zonën e Morsko dobro, për të parë se ku mund të ndërtohen komplekset turistike.
Sipas planit më të gjerë, Kastrati një pjesë të investimit në Mal të Zi do ta drejtonte në zhvillimin e mediave, për të filluar me një stacion radioteleviziv dhe një portal, i cili do të informonte qytetarët në gjuhën malazeze dhe shqipe. Një gjë të ngjashme Kastrati tentoi të bënte disa muaj më parë edhe në Shqipëri, duke i ofruar blerjen e 60% të pronësisë në televizionin “Euronews Albania”, i cili është pjesë e rrjetit mediatik europian. Mirëpo, pak javë më parë Kastrati e tërhoqi ofertën e tij pa dhënë shpjegime.
Një rol të rëndësishëm në këtë aferë ka shoku i Abazoviçit dhe inspektor i përgjithshëm i Agjencisë për Siguri Kombëtare, Artan Kurti, i cili është dënuar dy herë me burgim, për tentim vrasje dhe për lëndime të rënda trupore. Kurti tashmë është takuar dy herë me Shefqet Kastratin dhe detyra e tij në këtë biznes do të jetë sigurimi i logjistikës policore dhe strukturave të sigurisë në mënyrë që Kastrati ta zgjerojë biznesin e tij pa pengesa në të gjitha pjesët e Malit të Zi.
Kush është Shefqet Kastrati?
Shefqet Kastrati, i njohur ndryshe si “Çeti”, e filloi karrierën e tij në vitet ’90 të shekullit të kaluar si shofer kamioni. Sot, me ndihmën e Edi Ramës, ai ka mori burime kyçe shqiptare, nga nafta, sigurimet, aeroporti i vetëm ndërkombëtar, rrugët, ndërtimet, asetet ushtarake, tenderët shtetërorë etj. “Çeti” madje “monopolizoi pastrimin e parave të grupeve kryesore kriminale në Shqipëri.
“Shefqet Kastrati, sipas disa raporteve, është i frikësuar nga Lulzim Basha dhe Edi Rama, lidhja kryesore mes krerëve të grupeve kriminale të përfshira në trafikun e drogës në Shqipëri”, thotë vetëm një nga një seri artikujsh në mediat shqiptare që kanë të bëjnë me punët e Shefqet Kastratit.
Sipas raporteve shqiptare dhe ndërkombëtare, kompanitë e tij të ndërtimit janë “pastruesit” më të mëdhenj të parave nga droga, trafiku dhe aktivitete të tjera kriminale në Ballkan.
Që prej ardhjes në pushtet të Edi Ramës, Kastrati ka fituar mbi 600 tendera shtetërorë, me vlerë qindra milionë euro, përmes kompanive të tij që merren me tregtinë e naftës dhe sigurimet. Vetëm një nga ato kompani ka marrë mbi 400 tenderë, me një marzh fitimi deri në 30%. Kastrati ka fituar rreth 40 tendera vetëm në Bashkinë e Durrësit, ku sipas mediave shqiptare është në marrëdhënie të ngushta me Lulzim Berishën, kreun e të ashtuquajturit “klani drak”.
Mediat e quajnë Kastratin “mbret i korrupsionit, lidhjeve me krimin, pastrimit të parave, zhvatjes së të mirave publike” dhe e akuzojnë për lidhje personale dhe biznesi me trafikantin ndërkombëtar të drogës Anton Gjinaj, i njohur ndryshe si Pashk Rapi, i cili u arrestua në prill të 2021 në kufi në vendkalimin e Bozhajt, me ardhër arrest ndërkombëtar për kontrabandë droge dhe ndodhet në burg në Spuz.
Përveç qytetarëve që e akuzojnë se u ka shitur karburantin më të shtrenjtë në Ballkan, çmimi i të cilit nuk dihet se sa shkon për të ashtuquajturat “fondet e zeza”, emri i Kstratit përmendet edhe në disa raste të vrasjeve, rrëmbimeve dhe shantazheve. Pas tërmetit shkatërrues në Shqipëri në vitin 2019, Shefqet Kastrati u vu nën kritika të ashpra publike, për shkak se në autostradën që ai menaxhon vendosi tarifa për automjetet që vinin nga Kosova për të shpërndarë ndihma humanitare për familjet që mbetën pa strehë.
Kryeministri Rama më pas tentoi ta mbronte, por disa burime pohojnë se pasi mësoi se Kastrati merrte taksë, Rama i telefonoi “Çetit”, i bërtiti që të ndalonte menjëherë tarifën dhe e detyroi të dhuronte rreth 1.5 milionë euro për rimëkëmbjen e vendit pas tërmetit./ gazetajonë
