Klodiana Lala e ftuar në emisionin “Breaking” ka folur mes të tjerash edhe për ecurinë e hetimeve ndaj ish Presidentit të vendit Ilir Meta dhe bashkëshortes së tij Monika Kryemadhi.
Gazetarja e kronikës u shpreh se ndaj çiftit Meta-Kryemdhi po hetohet në disa drejtime, pasi ka dosje të hapur në lidhje me aferën CEZ DIA, lobimin në SHBA si dhe disa shpenzime spitalore të zonjës Kryemadhi.
“Kohët e fundit SPAK ka sekuestruar një celular në shtëpinë e nënës së zonjës Kryemadhi, i cili është zbërthyer nga ekspertët dhe aty janë zbuluar shumë biseda, të cilat janë duke u parë dhe verifikuar nga hetuesit e BKH dhe prokurorët e çështjes. Ato konsiderohen si një provë shumë e rëndësishme për hetuesit, është duke shkuar në institucione të ndryshme, po pyeten dëshmitarë të ndryshëm për të pasur prova që do t’i shërbejnë kësaj çështjeje.
Duhet të kemi parasysh që janë disa dosje në një, për CCEZ DIA, një dosje për lobimin në SHBA dhe disa shpenzime spitalore të zonjës Kryemadhi. Të gjitha këto çështje janë mbledhur në një të vetme dhe po hetohet në disa drejtime.
Disa prej bashkëpunëtorëve kryesorë të Kryemadhit jo vetëm që u është bërë kontroll në banesat e tyre, por po u merren dhe celularët”, tha Klodiana Lala duke shtuar se SPAK po heton dhe llogaritë bankare dhe lidhjet me një kryeqytet europian.
