Një 45-vjeçar shqiptar ka humbur jetë në një aksident tragjik të regjistruar natën e kaluar në Itali. Ai ka qenë duke drejtuar një kamion, teks ka shpëtuar djali i tij i cili po flinte gjumë në pjesën e sipërme të kabinës në momentin e aksidentit.
Mediat përtej Adriatikut raportojnë se kamioni po lëvizte në drejtim të veriut në zonën e Torino di Sangro pranë Chieti-t. Por, për arsye që nuk janë sqaruar plotësisht, shoferi nuk ka vënë re sinjalistikën dhe ka hyrë në një kantier rrugor ku po punohej. Për pasojë, kamioni është përplasur me një rimorkio ku ishin të vendosura disa barriera betoni.
Nga përplasja humbi jetën menjëherë shqiptari. Fatmirësisht djali i tij shpëtoi i dëmtuar. Aksidenti ishte i rëndë pasi 8 persona të tjerë, italianë dhe të huaj, që po punonin aty mbetën të lënduar. Ata u dërguan menjëherë në spital.
Mësohet se babë e bir po transportonin qershi. Dyshimet e para janë që ngjarja mund të ketë ndodhur si pasojë e hutimit, përgjumjes apo një sëmundjeje të papritur që kanë bërë që shqiptari të mos shihte paralajmërimet në rrugë dhe të shmangte korsinë.
