Ata dyshohet se importonin kokainë nga Amerika Latine në porte të ndryshme evropiane. Ata shisnin drogë me shumicë dhe pastronin para përmes një numri kompanish, duke përfshirë ato kroate. Europol shkatërroi një nga rrjetet më aktive evropiane të kontrabandistëve të kokainës me origjinë shqiptare, në një operacion të madh që përfshinte Prokurorinë e Shtetit të Qarkut të Zagrebit dhe policinë kroate USKOK, së bashku me autoritetet gjyqësore dhe policore nga shtatë vende.
“Dega kroate çon te pronari i hotelit në Porec?”. Kështu shkruajnë mediat kroate që flasin për kontrolle në pronat e biznesmenit shqiptar me pasaportë kroate Bashkim Osmani. Shumica e operacioneve u zhvilluan në Belgjikë dhe Spanjë, dhe kërkimet u kryen në mbi 80 vende. 45 të dyshuar janë arrestuar në disa aksione paralele, disa prej të cilave janë zhvilluar në Kroaci, Gjermani, Itali dhe Holandë.
Si bënin biznes
Të dyshuarit dyshohet se importonin kokainë nga Amerika Latine në porte të ndryshme evropiane. Droga transportohej me avionë, anije, makina dhe kamionë.
Më pas kokaina shitej me shumicë. Paratë u pastruan përmes një sërë kompanish në vende të ndryshme, duke përfshirë Kroacinë dhe Spanjën.
“Jutarnji list” shkruan se kontrolli i banesave dhe lokaleve në territorin e Republikës së Kroacisë është në vazhdim e sipër dhe jo zyrtarisht mësohet se bëhet fjalë për familjen e njohur Osmani, e cila ka hotelin Riviera në Poreç.
Siç është konfirmuar për “Jutarnji list” nga Ksenija Jurin Panić, zëdhënëse e Prokurorisë së Shtetit të Qarkut të Zagrebit, Zyra e Prokurorit të Shtetit të Qarkut të Zagrebit po ofron ndihmë juridike ndërkombëtare në këtë hetim ndërkombëtar, në të cilin janë përfshirë disa vende. Ndërkohë mediat në Spanjë e cilësojnë 43-vjeçarin Osmani si kreun e rrjetit.
Mediat gjermane shkruajnë për Bashkim Osmanin, një shqiptar me pasaportë kroate dhe tre vëllezërit e tij, duke thënë se ata kishin grumbulluar një pasuri përmes një sërë aktivitetesh të paligjshme, duke përfshirë tregtinë e drogës dhe trafikun e armëve.
Nga ana tjetër, Bashkim Osmani ka deklaruar vetë se pasurinë e ka fituar duke investuar në pasuri të patundshme në Gjermani, fillimisht në Hamburg e më pas në Spanjë.
Në mars të vitit 2020, Bashkim Osmani i tha “Nacional” se të gjitha akuzat kundër tij që ishin ngritur nga ligji gjerman me dyshimin se ai ishte pasuruar në mënyrë të paligjshme – ishin hedhur poshtë.
Me atë rast, ai tha se pas shpërnguljes në Hamburg në vitet 1980, familja rriti ndjeshëm pasurinë që kishin tashmë në Shqipëri, përfshirë lidhjet politike në Gjermani. Ai ka shpjeguar edhe se si ka blerë një hotel në qendër të Porecit.
Dashuria në Istria
“Kjo është dashuri. Unë jam rritur në Istria, çdo vit kam kaluar tre muaj në Istria. Është fenomenale këtu, siguria është e madhe, i lë fëmijët e mi të ecin këtu vetëm në plazh ose në rrugët e qytetit, gjë që nuk mund ta bëj as në Spanjë, as në Gjermani. Investimi ka ardhur krejt rastësisht katër vjet më parë. Bleva hotelin Riviera në Porec, të cilin fillimisht e bleu një gjerman nga i cili e bleva sepse nuk dinte çfarë të bënte me të”, tha në atë kohë Osmani.
Ai tha në atë kohë se qëllimi i tij ishte të ndërtonte një hotel të projektuar në mënyrë të shkëlqyer që do të kishte 74 suita luksoze.
