Emisioni investigativ “Piranjat” ka informuar sot se në sezonin e ardhshëm nuk do të transmetohet më në televizionin ABC News.

“’Piranjat’ ka patur një kontratë me televizionin ABC Neëw e cila zgjaste deri më datën 1 janar 2023, kontratë e cila është respektuar nga ne dhe televizioni.

Me skadimin e kontratës, as nuk është kërkuar nga ana jonë zgjatja e saj, as nuk na është kërkuar nga pronarët e rinj vazhdimi i saj.

“Piranjat” sigurojnë të gjithë shikuesit se misioni i tyre vazhdon, në cilindo televizion që të ndodhemi.

Korrupsioni, plagët sociale, e keqja e përditshmërise do vazhdojnë të “kafshohen” nga emisioni juaj i preferuar. Shihemi së shpejti!”, njofton emisioni investigativ në rrjetet sociale.

Ndërkohë, Vox News ka mësuar se në cilin televizion do të rinisë “Piranjat”. Drejtuesit e emisionit kanë pasur negociata intensive me News24 dhe me Syri TV dhe pas bisedimeve, ata kanë vendosur që të lidhin kontratën me Syri Tv. Emisioni pritet të nisë në fillim të muajit shkurt.

Ditët e fundit është larguar nga ABC NEWS edhe kryeredaktori i webit, gazetari Emirjon Senja, i cili rriti dhe fuqizoi webin Abcnews.al. Gazetari Senja ka njoftuar largimin.

Emisionet kritike ndaj pushtetit janë mbyllur menjëherë dhe paparajmërim në ABC NEWS

Gazetari Endri Xhafo, përmes një postimi në rrjetet sociale, bëri me dije se emisioni i tij “Log.” nuk do të transmetohet më në “Abc”.

“Sot paradite m’u komunikua se, me efekt të menjëhershëm, emisioni LOG. ndërpritet. Pra, për nesër, ditë e martë, duhet të njoftojmë të ftuarit të mos vijnë. Arsyeja zyrtare: Ristrukturim programor i ABC-së. Çështja është se me situatën aktuale të ABC-së faji mbetet kopil dhe të drejtën s’ke ku ta kërkosh. U daltë për hajër!”, tha Xhafo.

Emisioni i radhës që “i hiqet sinjali” i transmetimit është emisioni “Vetting” dhe këtë gjë e ka bërë me dije gazetarja Luli Progni.

Në një postim në rrjetet sociale ajo thotë se këtë të shtunë do të transmetohej tema “Administrata, si elektorat”, që trajton presionin e politikës ndaj administratës publike për t’u rreshtuar si elektorat, apo për të votuar partinë e rradhës në pushtet, por që nuk do të jepet.

Krahas mbylljes së emisioneve kritike, po planifikohen emisione me linjë pro qeverisë ndërsa janë afruar figura si Frrok Çupi, Mentor Nazarko apo Skënder Minxhozi. /Vox News